admin
لە ئینگلیزییەوە بۆ کوردی: مژدە حەسەن
له ژه‌مه‌نانى به‌یانیى پێشوودا دواى ئه‌وه‌ى كه پێم گوتبوو گۆشت و هێلكه‌مان هه‌یه، ماریى دڕنده، سێ پارچه‌نانى خۆشكراو به نۆكم بده‌رێ. هه‌وڵی دا نه‌یتوانى بگرى. له‌و كاته‌دا پیاوى باڵۆنه‌كه هات و وێنه‌ى ڕووداوه‌كانى گرت. باڵۆنێكى درووست كرد به ناوى باڵۆنى ״كۆتاژه‌مه‌نانى به‌یانى״ دواى ئه‌وه‌ى كه پێی گوت باڵۆنى ״كه‌ره‌ى ڕه‌نگكراو״. پیاوه‌كه گوتى: ״ئه‌مه ئه‌و جۆره شته‌یه كه به‌باشى ئه‌نجامى ده‌ده‌م.״ پیاوى باڵۆنه‌كه كه‌سێكى خاكى نییه. كه‌سیش پێشنیارێكى وه‌هاى نه‌كردووه. ״ئه‌م باڵۆنه زۆر به‌ناوبانگ ده‌بێت و قبووڵ ده‌كرێت. به‌ڵگه‌یه‌كى ده‌وڵه‌مه‌نده ده‌رباره‌ى مرۆڤ، وه‌كوو قوماشێكى چه‌رمى كۆنه كه وێنه‌كانى له‌سه‌ره.״ خانمى ده‌رزى هه‌رگیز ناتوانێت ئه‌م باڵۆنه بته‌قێنێت، هه‌رگیز، ته‌نانه‌ت گه‌ر بۆ ماوه‌ى سه‌دساڵیش له باوه‌شم بگرێت. ئێمه خۆشحاڵ بووین كه توانیمان ئه‌و (پیاوى باڵۆنه‌كه) دڵخۆش بكه‌ین، به به‌شداریكردن له كاره‌كه‌ى ئه‌ودا.
پیاوى باڵۆنه‌كه، باڵۆن به منداڵان نافرۆشێت. منداڵه‌كان دێن بۆ لاى و ده‌ڵێن، ״باڵۆنێكى شینمان بده‌رێ.״ پیاوى باڵۆنه‌كه‌ش ده‌ڵێت، ״بڕۆن دوور بكه‌ونه‌وه لێره منداڵینه، ئه‌م باڵۆنانه ته‌نیا بۆ گه‌وره‌كانن״، منداڵه‌كانیش ده‌ڵێن، ״تكایه كاكه، باڵۆنێكى سوور و باڵۆنێكى سه‌وز و باڵۆنێكى سپیمان بده‌رێ، ئێمه پاره‌مان پێیه.״ ״هیچ پاره‌یه‌كى منداڵم ناوێت.״ پیاوه‌كه وتى، ״پاره‌ى منداڵان ته‌ڕ و پیسه و ده‌سته‌كانت ته‌ڕ و پیس ده‌كات و تۆش به پانتۆڵه‌كه‌ت ده‌یسڕیت و پاشان هه‌موو پانتۆڵه‌كه‌شت ته‌ڕ و پیس ده‌بێت و دواتر داده‌نیشیت نان بخۆیت، به هۆیه‌وه كورسییه‌كه‌ش ته‌ڕ و پیس ده‌بێت، ڕێگه بده‌ن ئه‌و پیاوه كڵاوقاوه‌یییه نزیك ببێته‌وه، باڵۆنى ده‌وێت.״ منداڵه‌كان ده‌ڵێن، ״ئۆو تكایه، ئێمه پێنج باڵۆنى زه‌ردمان ده‌وێت كه هه‌رگیز نه‌ته‌قێت، له‌و جۆره دانه‌یه‌كى زه‌ردمان بۆ درووست بكه.״ پیاوى باڵۆنه‌كه گوتى: ״نه‌خێر، هیچ پارچه‌یه‌كى له‌و شێوه‌یه درووست ناكه‌م له‌و باڵۆنه زه‌رده باشانه‌م،״ ״باڵۆنه سووره‌كه‌ت به‌م زووانه ده‌ته‌قێت و سه‌وزه‌كه‌ش دواتر ده‌ته‌قێت، به‌ڵام زه‌رده‌كه هه‌رگیز ناتەقێت، هه‌رچه‌نده به توندییش په‌ستانى بخه‌یته سه‌ر یان شتى پێدا بكه‌یت، له‌گه‌ڵ ئه‌وه‌شدا هێشتا پیاوى باڵۆنه‌كه باڵۆن به منداڵان نافرۆشێت، ئه‌وه دژى یاساکانى ئه‌وه.״
پیاوى باڵۆنه‌كه ناهێڵێت وێنه‌ى بگریت، ئه‌و شتێك ده‌شارێته‌وه، ئه‌و زۆر كه‌سێكى زه‌حمه‌ته، نایه‌وێت كه‌سانى دیكه جووڵه‌كانى بدزن. ئه‌وه له جووڵه‌ى له‌شیدایه ئه‌و نهێنییه، جووڵه‌ى ڕاست و ورد و ڕوون.
پیاوى باڵۆنه‌كه باڵۆنى ماندوویەتى و ئۆراپرۆ نۆبیس و ڕیۆن و باڵۆنى ئه‌نجامدانى كۆتاشت له شه‌ودا، کە ئه‌مانه‌ش بریتین له زه‌عفه‌ران، دارچینى، خوێ و كه‌ره‌وز به دواى یه‌كدا، هەروەها ئه‌و باڵۆنى ״هێشتا نا״ و باڵۆنى ״هه‌ندێك جار״یش ده‌فرۆشێت. ئه‌و سێرك ئه‌نجام ده‌دات، هه‌موو سێركێك. هه‌ندێك خه‌ڵك ناچن بۆ بینینى سێرك و چاویان به پیاوى باڵۆنه‌كه ناكه‌وێت و باڵۆنیش ناكڕن. ئه‌مه شتێكى ناخۆشه، نزیكه له زۆربه‌ى خه‌ڵكه‌وه له هه‌ر جێگه‌یه‌ك و له هه‌ر كاتێكدا بێت و نه‌شیه‌ت بۆ بینینى سێرك، ئه‌مه به‌دبه‌ختییه. ئه‌وان نایه‌ن و باڵۆنى قاوه‌یى ناكڕن، كه باڵۆنى ژیانێكى درێژى چێژبه‌خشه كه باڵۆنى سێرئاسیاى به‌رلینه. ״باڵۆن نافرۆشم جیجوون.״ پیاوه‌كه وتى، ״با خه‌ڵكى تر بیفرۆشێت، بهێڵه با خه‌ڵكى تر ده‌ستیان پیس و ته‌ڕ ببێت به پاره‌ى منداڵه‌كان كه دابه‌شیان كردووه له گۆره‌وییه‌كانیاندا.״
״ئه‌وه كامێرایه پێت به‌ڕێز؟ دوورى بخه‌ره‌وه.״ پیاوى باڵۆنه‌كه، باڵۆنى ״ئه‌و شتانه‌ى كه ده‌بوو بمكردایه و نه‌مكرد״ ده‌فرۆشێت، ئه‌ویش بێجییه‌كه‌یه. هه‌روه‌ها باڵۆنى ״گۆرانیى سۆزدارى جوونتاى شێت״ به دڵنیایییه‌وە باڵۆنفرۆشه‌كه له‌ژێر نمه‌ى بارانه‌كه‌دا وه‌ستا له نزیك گه‌نمه‌شامییه‌كه‌وه و باڵۆنى ״خۆزگه ده‌متوانى״ و باڵۆنى ״بۆسۆنى بیر ده‌كاته‌وه״ و باڵۆنى ״ڕێگریكردن״ و باڵۆنى ״باش نییه״ى ڕه‌وانه ده‌كرد. كامه‌یان باڵۆنى منه، كاكه؟ ئه‌وه‌یه باڵۆنى ڕێككه‌وتنى ئه‌وانەى كێشه درووست ده‌كه‌ن (ڕێككه‌وتنى كێشه‌درووستكه‌ره‌كان؟ باڵۆنى خودا ده‌زانێت كه هه‌ڵمدا؟)
ڕۆژێك له ڕۆژان پیاوى باڵۆنه‌كه خانمى ده‌رزى ده‌بینێت. ئه‌و له كارته‌كاندایه، له ئه‌ستێره‌كاندایه، له هه‌ناوى گیانداره پیرۆزه‌كاندایه. خانمى ده‌رزى ژنێكه كه جله‌كانى به‌رى ده‌رزى پێدا چه‌قیوه، به ڕیز به‌ڵام به شێوه‌یه‌كى ڕێكوپێك نا به‌ڵكوو به ناڕێكى و هه‌ڕه‌مه‌كى لێرهوله‌وێ. ڕه‌نگه هه‌شت هه‌زار ده‌رزى به جله‌كانییه‌وه بێت، یان ڕه‌نگه ده هه‌زار ده‌رزى پێوه بێت، یانیش ڕه‌نگه دوانزه هه‌زار بێت. خانمى ده‌رزى شتێكه كه پێویستە ببینرێت. ڕۆژێك، به یه‌كه‌وه له‌گه‌ڵ پیاوى باڵۆنه‌كه‌دا، به گرده‌كه‌دا غل ده‌بنه‌وه بۆ خواره‌وه. قۆڵى پیاوى باڵۆنه‌كه به چوارده‌ورى ده‌رزییه‌كانى خانمه‌كه‌وه ده‌بێت و په‌شۆكان و شپرزه‌ییى خانمه‌كه‌ش ده‌ورى باڵۆنه‌كانى ئه‌و ده‌دات، ته‌نانه‌ت ده‌ورى باڵۆنه زه‌رده‌كه‌ش.
به گرده‌كه‌دا غل ده‌بنه‌وه بۆ خواره‌وه، خانمى ده‌رزى، ده‌رزیی ״زۆر ئاره‌زووى ده‌كه‌م״ى پێیه، ده‌رزیى ״به هیواى به‌ختێكى باش‘ـى پێیه، هه‌روه‌ها پڕوپاگه‌نده‌ى ئه‌وه‌ى ده‌كرد كه ده‌رزیى ״سه‌رلێشێواندنى كۆتاداواكارییه‌كه‌ى ساكیم״ى پێیه بۆ كونكردن.
كاتێك كونكردنى باڵۆنه‌كان ده‌بێته شتێكى ڕێپێدراو و به شێوه‌یه‌كى به‌ربڵاو ستایش ده‌كرێت، ئه‌و ژنانه ده‌بن كه ته‌نیا ڕێگه‌یان پێ دراوه وا بكه‌ن، خانمى ده‌رزى گوتى.
خانم ده‌رزیی ״سبه‌ى شه‌وى‘ هه‌یه- ده‌رزییه‌كى به‌دكاره- ئه‌وانه‌ى بینیویانه وا ده‌ڵێن.
باوه‌شه مه‌زنه‌كه، له كاتێكدایه كه پیاوى باڵۆن و خانمى ده‌رزى به گرده‌كه‌دا غل ده‌بوونه‌وه بۆ خواره‌وه. شتێكى ترسناكه، ئه‌سپه‌كان به هه‌موو ئاڕاسته‌كاندا ڕاده‌كه‌ن و بڵاو ده‌بنه‌وه، خه‌ڵكى ئاسایى سه‌رى خۆیان به‌و زه‌رفانه‌ى بۆ بازاڕكردن پێیانه داده‌پۆشن. نامه‌وێت بیرى لێ بكه‌مه‌وه. تۆ خۆت به ته‌نیا فوو ده‌كه‌یته باڵۆنه‌كانه‌وه، پیاوى باڵۆن؟ یاخود كه‌سێك یارمه‌تیی داویت؟ خانمى ده‌رزى، چۆن شتى وا ده‌بێت، تۆ زۆر قه‌ڵه‌ویت؟ ئه‌وه شتێكه سه‌باره‌ت به منداڵیت؟
پیاوى باڵۆنه‌که ده‌ست ده‌كات به په‌ستانخستنه‌سه‌ر باڵۆنی ״چاكه״. كونى مه‌كه ده‌نا ده‌بێته خۆڵه‌مێش.
خانمى ده‌رزى به‌ره‌نگارى ده‌بێته‌وه به ده‌رزیى ״ئاى من له بیرم كرد.״ پیاوى باڵۆنه‌كه باڵۆنى ״خه‌ریكه ناوازه ده‌بێت״ درووست ده‌كات. خانمى ده‌رزى ده‌گه‌ڕێته‌وه به ده‌رزیى ״زۆر حه‌زیان لێم نه‌بوو‘ـه‌وه. پیاوى باڵۆنه‌كه به‌وێدا دێت و ده‌چێت، به باڵۆنى ״كۆتاده‌رچوون پێش ئه‌وه‌ى باجى هاتوچۆت لێ وه‌ربگیرێت״ه‌وه.
خانمى ده‌رزى، به ده‌رزیى ״كه‌س نازانێت به دڵنیایییه‌وه״ وه‌ڵام ده‌داته‌وه. پیاوى باڵۆنه‌كه پێشنیارى باڵۆنى ״ڕۆژانى باشتر״ ده‌كات. خانمى ده‌رزییش پێشنیارى ده‌رزیی ״شه‌رابێكى سپیتر״ ده‌كات.
زۆر خراپ ده‌بێت نامه‌وێت بیرى لێ بكه‌مه‌وه.
خانمى ده‌رزى ڕاستییه‌كان ده‌ڵێت. پیاوى باڵۆنه‌كه‌ش درۆ ناكات، به ته‌واوه‌تى. چۆن ده‌بێت باڵۆنى ״خۆبه‌ده‌سته‌وەنه‌دان״ به درۆ ناوى بهێنرێت؟
خانمى ده‌رزى قسه‌كانى ڕاسته‌وخۆتره. پیاوى باڵۆنه‌كه كه‌متر به‌و شێوه‌یه‌یه. هه‌ڵوێستى هه‌ردووكیان پێشبینینه‌كراوه.
به گرده‌كه‌دا پێكه‌وه غل ده‌بنه‌وه بۆ خواره‌وه، دوو كه‌وتن له سێ جاردا. ده‌رزیی پێدا بكه خانمى ده‌رزى. خۆت بكشێنه پیاوى باڵۆن. كاتێك كه باڵۆنه ڕه‌نگكه‌ره‌یییه‌كه‌ى درووست كرد تۆزێك هه‌ستمان به باشى كرد.
ئه‌و ڕووداوانه‌ى به‌سه‌رماندا هات له دنیادا ده‌نگى دایه‌وه، شتێكى به‌سوود بوو بۆ كه‌سانى دیكه‌ش. پیاوى باڵۆنەکە ده‌ڵێت باڵۆنى ״كۆتاكۆنسێرت״م پێیه. خراپ نییه، هه‌ندێك خه‌ڵك حه‌زى پێ ناكه‌ن. هه‌ندێكی دیكه حه‌زیان لێى ده‌بێت. باڵۆنى ״زۆر سامناك״یشم پێیه. هه‌موو باڵۆنه‌كان ناتوانن كه‌یفخۆشت بكه‌ن، هه‌موو باڵۆنه‌كان دڵخۆشكه‌ر نین، به‌ڵام من سوورم له‌سه‌ر ئه‌وه‌ى ئه‌م باڵۆنانه مافى ئه‌وه‌یان هه‌یه كه گوێیان لێ بگیرێت! ڕێگه بده‌ن ئه‌و پیاوه چاكه‌ت ڕه‌شه بێته پێشه‌وه، باڵۆنى ده‌وێت.
باڵۆنى ״له‌وانه‌یه״ باشترین باڵۆنى منه.